Temporary Fuel Surcharge To Ease Pressure
September 19, 2022
TAU LOOKS TO PURCHASE 4MW PRIVATELY GENERATED SOLAR ENERGY
October 19, 2022
I te mea te kake uatu nei te moni o te inu e te disara ki runga no tetai au manamanata takake mei te tamaki e tupu nei i Ukraine e te vai atura, kua akara akaou Te Aponga Uira (TAU) no te akapapu me ka rauka iaia i te akataka uatu rai ma te kore e taii te turanga o te uira.
Kia marama oki te iti tangata e, ko te disara e te inu tetai akapou’anga moni maata a TAU e rauka ai ia matou i te akataka i te uira. No reira, te riro nei teia au akakake’anga no te disara e te inu ei tamanamanata i te turanga o TAU. I roto i teia ono marama i topa, kua kake te moni o te disara e te inu tapapa atu ki te anere petene. I te toru mataiti i topa (mua ake i te tuatau o te COVID-19), e 33% o te akapou’anga moni e aere ana ki runga i te disara e te inu. I teia taime, kua kake te reira kite 65%. Ko te mea tumatetenga, kare atu a matou ravenga ke, mari ra, ko te akatu’anga atu i tetai o teia akapou’anga moni kia rauka ia matou i te akataka uatu rai i te uira i te au tuatau ki mua. Ka riro teia moni akakake i te tutaki i tetai tu’anga o te moni kake o te disara e te inu, kare no te tutaki i tetai au akapou’anga moni no teia au mataiti i topa ki muri.
E mea puapinga kia marama katoa tatou e noatu e moni akakake teia no te uira ki runga I te aronga e ta’anga’anga nei i te uira, ka apai rai a TAU i tetai tu’anga o te teia’a na roto i te apai’anga āpa i te akakake’anga moni o te disara e te inu, te ka arapaki ki runga ia TAU no te akataka’anga i te uira.
No reira teia te reo akakite’anga. Ka akamata atu teia akakake’anga moni no te disara e te inu a te Monite, ra 3 o Okotopa no te au tatau’anga mita. Te parani ia nei kia akamotu I te ra 30 o Tiunu 2023 (ka akara aka’ou ia teia). Kare teia tiati e akapae’ia, mari ra ka taru ia te $0.15 moni kake i te uniti okotai mei tei akaari ia i raro nei.
The Fuel Surcharge applies as follows to the Tariff Categories of TAU:
|
Tariff Categories |
Current Usage Tariff |
Temporary Fuel Surcharge |
Temporary Tariff as of 03 October 2022 |
|
Domestic Customers Dual Customers |
$0.53 – first 60 units |
$0.15 |
$0.68 |
|
$0.77 – 61-300 units |
$0.15 |
$0.92 |
|
|
$0.79 – over 300 units |
$0.15 |
$0.94 |
|
|
Commercial Customers |
$0.77 |
$0.15 |
$0.92 |
|
Demand Customers |
$0.68 |
$0.15 |
$0.83 |
Mei tei taiku’ia, ko teia akakake’anga moni no te disara e te inu, no tetai tuatau poto ua e ka akara putuputu’ia kia kitea te tuatau e akakore’ia ai te reira.
Kua kite matou e ka riro teia akakake’anga moni ei apai’anga maata kia tatou e ta’anga’anga nei i te uira, no reira te akamaroiroi atu nei matou i te aronga e manamanata nei e kare e peke ta ratou pira, kia aere mai aravei i to matou aronga anga’anga, kia rauka te uriuri manako no runga i tetai parani tau no te tutaki.
Mei tei akaari ia e to matou Kopapa Metua(Shareholder), koia te Cook Islands Investment Corporation (CIIC) i roto i tana karere, kua angaanga pakari ana a TAU i teia mataiti i topa ake nei, i te angaanga kapiti atu ki te ADB e te au putuputu’anga takake, no runga i te akatupu’anga i te Uira Natura ta matou e tapapa nei i te akakite atu a teia au epetoma e tu mai nei.
Te akameitaki atu nei matou te Te Aponga Uira, i te katoatoa e ta’anga’anga nei i te uira no to kotou marama e te turuturu ia tatou e aere kapiti nei na roto i teia tuatau manamanata, i te mea kua na roto atu ana tatou i te maki Covid-19.
